Үөһээ Бүлүүгэ бэҕэһээҥиттэн волейболга алтыс өрөспүүбүлүкэтээҕи турнир саҕаламмыта
Бүгүн кыайыылаахтар ааттара билиннэ. Бу күрэхтэһии СӨ норуотун хаһаайыстыбатын үтүөлээх үлэһитэ, ССРС бэчээтин туйгуна, улуус историятыгар идэтийбит полиграфиһынан биллэр ытык-мааны киһи, тустуук, улууска волейбол сайдыытыгар сүҥкэн кылаатын киллэрсибит тренер, волейболга Саха АССР сүүмэрдэммит хамаандатын чилиэнэ, өр сылларга оройуон саахымакка федерациятын салайбыт Василий Степанович Кынатов сырдык кэриэһигэр ананна.
Үөһээ Бүлүүтээҕи «Үс хоһуун» спортивнай комплекска өрөспүүбүлүкэтээҕи турнирга Үөһээ Бүлүү, Мэҥэ Хаҥалас, Уус Алдан, Ньурба, Сунтаар уонна Бүлүү хамаандалара кытыннылар. Күрэхтэһии түмүгүнэн дьахталларга 6 хамаандаттан 3-с миэстэ Кырыкый (Үөһээ Бүлүү), 2-с миэстэ Бэдьимэ (Мэҥэ Хаҥалас), 1-кы миэстэ Байаҕантай (Уус Алдан), онтон эр дьоҥҥо 10 хамаандаттан 3-с миэстэ Кырыкый (Үөһээ Бүлүү), 2-с миэстэ Байаҕантай (Уус Алдан ), 1-кы миэстэ Бэдьимэ (Мэҥэ Хаҥалас) буоллулар.
«Үөһээ Бүлүү» хаһыат анал бирииһин Боотулуу нэһилиэгин хамаандатын оонньооччутугар Марфа Егороваҕатуттардылар.
Николай Николаев, Үөһээ Бүлүү улууһун волейболга федерациятын бэрэссэдээтэлэ, Үөһээ Бүлүү улууһун дьокутааттарын Сэбиэтин бэрэссэдээтэлэ:
— Үөһээ Бүлүүгэ волейболга өрөспүүбүлүкэ таһымнаах күрэхтэһии аан маҥнай ыытылынна. Үрдүк тэрээһиннээхтик, таһымнаахтык ааста. Василий Кынатов улууспутугар волейбол күрэхтэһиитин күүскэ тэрийбит салайааччы, энтузиаст буолар. Саахыматы эмиэ күүскэ сайыннарбыта. Үөһээ Бүлүүгэ өр сылларга типография дириэктэринэн үлэлээбитэ. Онон бүгүн Бэчээт күнүгэр кини сырдык кэриэһигэр маннык күрэхтэһии ыытыллыбыта бэлиэ суолталаах.
Василий Петров, Үөһээ Бүлүүтээҕи спортка уонна физическай култуураҕа управлениетын начаалынньыга:
— Күрэхтэһии икки күн устата өрө күүрээннээхтик, үрдүк таһымнаахтык ааста. Кыттааччылар астынан тарҕастылар. Түгэнинэн туһанан, ыраахтан-чугастан кыттыбыт спортсменнарга, тэрээһин үрдүк таһымнаахтык ыытылларыгар күүс-көмө буолбут дьоҥҥо махталбын тиэрдэбин!
Күрэхтэһии кыайыылаахтарын улуус баһылыгын 1-кы солбуйааччы Семен Михалев, улуус волейболга федерациятын бэрэссэдээтэлэ Николай Николаев, улуус спортка уонна физическай култуураҕа управлениетын начаалынньыга Василий Петров, Василий Кынатов уола Д.С. Спиридонов аатынан 4-с нүөмэрдээх оскуола дириэктэрэ Юрий Кынатов, күрэхтэһии кылаабынай судьуйата Яков Сивцев эҕэрдэлээтилэр.