Тутууну урбаанньыт Никифор Дмитриев бэрт кылгас кэм иһигэр ирдэбилгэ эппиэттэһэр гына күрүөлээн, анал волейбол сиэккэлээн, баскетбол щиттээн оҥорбут. 

Догдоҥоҕо саҥа былаһаакка «Гражданскай көҕүлээһин» бырайыак үбүлээһининэн, онуоха эбии олохтоох дьаһалта итиэннэ нэһилиэк олохтоохторо кыттыһан тутулунна. Ытык кырдьаҕас Аркадий Захаров алгыһынан сиэр-туом оҥоһулунна. Аалай лиэнтэни нэһилиэк баһылыга Иван Новгородов, улуус култуураҕа уонна духуобунай сайдыыга управлениетын начаалынньыгын солбуйааччы, нэһилиэк куратора Надежда Максимова, Догдоҥо нэһилиэгин ыччакка исписэлииһэ Артур Карамзин быстылар.

Улуус баһылыга Николай Старостин, Ходоро нэһилиэгин дьаһалтатыттан, улуустааҕы успуорт управлениетын, Догдоҥо нэһилиэгин дьокутааттарын ааттарыттан, нэһилиэк олохтоохторуттан нэһилиэк бастыҥ спортсменнарыгар Бүтүн Россиятааҕы национальнай оонньуулар бэстибээллэрин кыайыылааҕын, төрүт омуктар аан дойдутааҕы оонньууларыгар кыайыыны ситиспит Алина Турчинаҕа, буоксаҕа успуорт маастара Михаил Скрыбыкиҥҥа, Виктор Черемкиҥҥа, Светлана Матвееваҕа харчынан сэртипикээттэр, бэлэхтэр  ананнылар.

Догдоҥо оскуолатын үөрэнээччилэрин (сал. Захар Сидоров), «Сардаҥа» инбэлииттэр түмсүүлэрэ эҕэрдэ нүөмэрдэрин тиэртилэр. Бу күн Хара уонна Догдоҥо нэһилиэктэрин ыччаттарын футболга хамаандаларын табаарыстыы көрсүһүүтэ тэрилиннэ. Кыайыыны харалар ситистилэр.

Светлана ИВАНОВА, «Эркээйи экспресс»