Манна Индигиртэн, Сайдыыттан, Хонууттан Төбүлэхтэн уопсайа 11 хамаанда буолан бастыҥы быһаарыстылар. Күүстээх оонньооччулардаах, күрэх аайы кырата 2 хамаандалаах кыттар Улахан Чыыстай нэһилиэгиттэн быйыл хамаанда кэлбэтэ, маннык таһымнаах күрэххэ ситэ бэлэмэ суох буолан, уонна сорох оонньооччулар үлэлэригэр ыктаран кыайан кэлбэтилэр. Өрүү сэргэх оонньууну көрдөрөр Соболоох нэһилиэгин оонньооччулара, сорохторо Төбүлэххэ буолар тэрээһиҥҥэ кыттыыны ыла бараннар быйылгы күрэххэ кыайан кэлбэтилэр. Ол да буоллар күрэх үс күн тухары сытыытык, кыл мүччү кыайыылаах, хотторуулаах интэриэһинэй оонньуулардаах ааста. Күрэх аһыллыытыгар оройуон баһылыгын социальнай боппуруостарга солбуйааччы Х.П.Кривошапкина күрэх саҕаламмытынан эҕэрдэлээтэ, уонна бу “Абриколь” БК сабыллыбатын туһугар араас таһымнаах үлэни, кэпсэтиини ыытыам диэн эрэннэрбитин бильярдистар ытыс таһыныынан уруйдаатылар. Күрэх тэрийээччитэ, оройуоҥҥа бильярд спордун Федерациятын президенэ П.С. Федоров мустубут дьоҥҥо, бильярд хайдах саҕаламмытын, туох үлэ барбытын, БК хайдах тэриллибитин, ханнык ситиһиилэр баалларын туоһулуур презентация көрдөрбүтэ дьон болҕомтотун тарта. Күрэхпитигэр төнүннэххэ, күүстээх  оонньооччулардаах Индигир нэһилиэгин бильярдистара- Андросов В.В, Иванов Н.В, Уваровскай М.А бу сырыыга кыайыы өрөгөйүн биллилэр уонна оройуон баһылыгын Кубогын илдьэ бардылар. Иккис миэстэҕэ Слепцов В.Н-1, Софоронов В.А, Слепцов В.Н-2 састааптаах Хонуу-2, үһүс миэстэлэргэ Сааһыыр-Федоров П.С, Атласов Д.Х.Софронов Г.В, уонна Тарабукин Н.П, Иванов В.Н, Винокуров В.Ю састааптаах хамаандалар таҕыстылар. Ханнык да улахан күрэх саамай тыҥааһыннааҕа, долгутуулааҕа, күүрээннээҕэ ол муҥутуур кыайыылааҕы быһаарар күрэх. Усулуобуйа быһыытынан “Комбинированая пирамида” ол аата оонньооччулар “Московская пирамида”, “Свободная пирамида” уонна “Невская пирамида” сэрэбиэйинэн талан икки кыайыыга дылы 3-тэ оонньууллар. Өскөтүн ахсаан 1 : 1 буоллаҕына быһаарыылаах 3 оонньуу суолтата улаатар. Манна барыта 19 оонньооччу суруйтарбытыттан Индигиртэн Никифоров Радислав уонна Хонууттан Винокуров Вячеслав кыайыылааҕы быһаарар оонньууга дылы хотторбокко тиийдилэр. Бу оонньууга 2:1 ахсаанынан кыайан аан бастаан оройуон абсолютнай чемпионунан Хонууттан Винокуров Вячеслав буолла уона харчынан  бириис тутта. Иккис Никифоров Радислав, үһүскэ Тарабукин Николай, Никулин Николай буоллулар. Турнир соһуччу түгэнинэн маннык күрэхтэр кыайыылааҕа, призера Андросов В.В. хотторуута буолла. Күрэх бастыҥ оонньооччутунан Слепцов В.Н-2 ааттанна уонна федерация аатыттан анал бириис тутта. Оттон Софронов В.А күрэх арыйыытынан ааттанна уонна эмиэ анал бириис тутта. Виктор Афанасьевич бастаан утаа күрэххэ кэлэн кэтээн көрөр, онтон күрэххэ кыттыһан оонньуур таһымын үрдэтинэн билигин хайа баҕарар оонньооччуну соһутар оонньуулаах бильярдист буолбутун бары бэлиэтээтилэр. Урукку сылларга ааспыт күрэхтэргэ тэҥнээтэххэ оонньооччулар таһымнара балачча үрдээбитэ харахха быраҕыллар. Оонньооччулар үчүгэй хаачыстыбалаах кийдаммыттар. Уонна оройуоҥҥа бильярд спордун көҕүлээччитэ, оройуоннааҕы бильярд спордун Федерациятын президенэ Федоров П.С. уонна кини көмөлөһөөччүлэрэ Слепцов В.Н-1, Тарабукин Н.П, нэһилиэк аайы бильярды сүрүннүүр дьоммут Индигиргэ Хадаров А.М. Сааһыырга Парилов А. С. курдуктар күүстэринэн, бильярд биһиги оройуоммутугар сүрдээҕин сайынна, биһиги оонньооччуларбыт өрөспүүбүлүкэ таһымнаах күрэхтэргэ ситиһиилэрэ да, ону туоһулууллар. Аныгыс күрэх олунньу ый бүтүүтэ ыытыллара сабаҕаанар, онно оройуон хамаандата сүүмэрдэнэн Дьокуускайга ыытыллар күрэххэ кыттара былааннанар. Күрэххэ мустубуттар бары бу бильярднай клуб сабыллыбакка үлэлии турарыгар баҕардылар уонна оройуон, Хонуу сэлиэнньэтин салалтата сөптөөх быһаарыыны ылынан бильярдистар кэккэлэрэ өссө хаҥыы туруо диэн эр санаалаах тарҕастылар.

Спорду таптааҥ, спордунан дьарыктаныҥ чөл олохтоох буолуҥ.

А.В.Слепцов күрэх судьуйата.